मुंबई-पुणे एक्स्प्रेस वेच्या मिसिंग लिंकवर मालवाहू वाहनांना कायमस्वरूपी बंदी!

पिकअप व्हॅन, टाटा एससह सर्व मालवाहू वाहनांना प्रवेश निषिद्ध;

कारसाठी ताशी १०० तर प्रवासी बससाठी ८० किमी वेगमर्यादा निश्चित

पुणे : मुंबई-पुणे यशवंतराव चव्हाण द्रुतगती महामार्गावरील बहुचर्चित मिसिंग लिंक (कनेक्टिंग लिंक) मार्गावरून प्रवास करणाऱ्या वाहनचालकांसाठी महत्त्वाची बातमी आहे. या मार्गावरील वाहतूक सुरक्षिततेच्या दृष्टीने महाराष्ट्र राज्य वाहतूक पोलिसांनी नवीन नियमावली जारी केली असून, १ नोव्हेंबर २०२६ पासून सर्व प्रकारच्या मालवाहू वाहनांना या मार्गावर कायमस्वरूपी प्रवेशबंदी लागू करण्यात आली आहे. यामध्ये मोठ्या ट्रक, कंटेनर, मालवाहू टेम्पो, पिकअप व्हॅन तसेच टाटा एससारख्या छोट्या व्यावसायिक वाहनांचाही समावेश आहे.

वाहतूक विभागाचे अपर पोलीस महासंचालक (वाहतूक) प्रवीण साळुंके यांनी २६ ऑक्टोबर २०२६ रोजी यासंदर्भात अधिसूचना जारी केली आहे. या नियमावलीनुसार मालवाहू वाहनांना मिसिंग लिंकऐवजी मुंबई-पुणे द्रुतगती महामार्गाच्या मूळ मार्गिकेचा वापर करावा लागणार आहे.

बोगद्यांची रचना आणि प्रवाशांच्या सुरक्षिततेला प्राधान्य

मिसिंग लिंक हा मुंबई-पुणे द्रुतगती महामार्गावरील खोपोली ते कुसगावदरम्यानचा सुमारे १३.३ किलोमीटर लांबीचा महत्त्वाचा मार्ग आहे. या प्रकल्पामध्ये लांब बोगदे, उंच व्हायाडक्ट आणि अत्याधुनिक केबल-स्टेड पुलाचा समावेश आहे.

या मार्गामुळे खंडाळा घाटातील वळणावळणाचा रस्ता टाळून मुंबई-पुणे प्रवासाचे अंतर सुमारे सहा किलोमीटरने कमी होते. तसेच प्रवासाच्या वेळेत अंदाजे २० ते ३० मिनिटांची बचत होण्यास मदत होते.

मात्र, या मार्गावरील बोगद्यांची तांत्रिक रचना, वाहनांची सुरक्षित हालचाल आणि संभाव्य वाहतूक कोंडी लक्षात घेऊन मालवाहू वाहनांना प्रवेश न देण्याचा निर्णय घेण्यात आला आहे.

कोणत्या वाहनांना प्रवेशबंदी?

नवीन नियमांनुसार खालील वाहनांना मिसिंग लिंकवर प्रवेश करता येणार नाही.

१. सर्व प्रकारचे मालवाहू ट्रक. २. कंटेनर वाहने. ३. मालवाहू टेम्पो. ४. पिकअप व्हॅन. ५. टाटा एस आणि तत्सम लहान व्यावसायिक मालवाहू वाहने. ६. ज्वलनशील पदार्थ वाहून नेणारी वाहने. ७. स्फोटक पदार्थांची वाहतूक करणारी वाहने. ८. अन्य धोकादायक रसायने व पदार्थ वाहून नेणारी वाहने.

विशेष म्हणजे, केवळ अवजड वाहनांनाच नव्हे तर छोट्या मालवाहू वाहनांनाही या बंदीतून सूट देण्यात आलेली नाही.

कार आणि प्रवासी बससाठी वेगमर्यादा निश्चित

मिसिंग लिंकवरून प्रवास करणाऱ्या वाहनांसाठी स्वतंत्र वेगमर्यादा निश्चित करण्यात आली आहे.

खासगी कार, जीप आणि इतर बिगर-मालवाहू हलकी मोटार वाहने : ताशी १०० किलोमीटर.

प्रवासी बस आणि इतर परवानगी असलेली प्रवासी वाहने : ताशी ८० किलोमीटर.

वाहनचालकांनी निर्धारित वेगमर्यादेचे पालन करणे आवश्यक आहे. विशेषतः बोगद्यांमधून प्रवास करताना वेगावर नियंत्रण ठेवणे आणि वाहतूक पोलिसांच्या सूचनांचे पालन करणे बंधनकारक आहे.

मालवाहू वाहनांनी कोणता मार्ग वापरायचा?

मिसिंग लिंकवर प्रवेशबंदी असलेल्या सर्व वाहनांनी मुंबई-पुणे द्रुतगती महामार्गाच्या जुन्या म्हणजेच मूळ मार्गिकेचा वापर करावा, असे वाहतूक पोलिसांनी स्पष्ट केले आहे.

त्यामुळे मुंबई-पुणे प्रवास करणाऱ्या ट्रक, कंटेनर, टेम्पो आणि व्यावसायिक मालवाहू वाहनांच्या चालकांनी प्रवासाचे नियोजन करताना या नियमांची नोंद घ्यावी.

वाहनचालकांना महामार्ग पोलिसांचे आवाहन नवीन नियमांची अंमलबजावणी

१ नोव्हेंबर २०२६ पासून पुढील आदेश येईपर्यंत कायम राहणार आहे. वाहनचालकांनी आपल्या वाहनाच्या प्रकारानुसार मार्गाची निवड करावी. प्रवेशास मनाई असलेल्या वाहनांनी मिसिंग लिंकवर जाण्याचा प्रयत्न करू नये.

वाहतूक नियमांचे उल्लंघन टाळून स्वतःसह इतर प्रवाशांची सुरक्षितता जपावी, असे आवाहन महामार्ग वाहतूक पोलिसांकडून करण्यात आले आहे.

प्रवाशांची सुरक्षितता, वाहतुकीचे नियोजन आणि अपघातांना प्रतिबंध करण्याच्या दृष्टीने मिसिंग लिंकवरील ही नवीन नियमावली महत्त्वपूर्ण ठरणार आहे.

महत्त्वाची संपादकीय नोंद : मालवाहू वाहनांवरील बंदी १ मे २०२६ पासूनच लागू होती. १ नोव्हेंबरपासूनच्या नव्या अधिसूचनेने ही बंदी कायमस्वरूपी पुढील आदेशापर्यंत सुरू ठेवली आहे. त्यामुळे बातमीत हा फरक स्पष्ट केला आहे. �